Leave a comment

Roën Trinidad – Superando PTSS i alkansando su metanan

Roen Trinidad profileWILLEMSTAD – Dia 29 di Novèmber, 2015, Eldrion Regina i Roën Trinidad, lo tin un enkuentro gratis na UOC – antes UNA – di 5 pa 8 di anochi, unda e públiko por hasí pregunta i kòmbersá riba diferente tópiko interesante pa yega na un bida yená ku propósito. Resientemente, Roën Trinidad di 31 aña, a relata su eksperensianan impaktante komo èks militar hulandes, kual sigur a resoná den nos komunidat. Su mensahe ta simpel, buska inspirashon den tur kos i lo bo haña bo mishon riba e mundu akí. Na Novèmber, Eldrion a uni forsa ku Roën i Didi Gregorius, short stop di Yankees, pa duna su promé charla na Kòrsou. Mas ku 300 persona a reuní pa skucha kon importante ta pa determina bo mishon, bo vishon,  i últimamente bo strategia di bida.

019Na edat di 15 aña, Roën a muda pa Hulanda pa sigui ku su estudio sekundario. “Mi kièr a bai Hulanda paso mi bira mas sabí ku mi kompatriota di klas”, ela splika. Roën  a establese su mes serka su ruman muhé na Delfzijl, Groningen, unda ela bai den e direkshon di enfermeria. “Despues di tempu, mi mama a bin biba Hulanda, i m’a bai biba serka dje. Mi mama no tabatin hopi entrada pa kubri tur gastu nan p’ami i servisio militar ta e úniko kaminda unda nan paga pa bo bai skol i paga bo tambe”, ela splika.

 

Roën  semper a lanta ku un pashon pa arma pa motibu di su abuelo, kende tabata traha hefe di seguridat na DOK. “Semper e tabata karga arma i tabata limpia su arma”, Roën ta kòrda. Na edat di dieseis i mei, Roën  a drenta servisio militar, paso tabatin un nesesidat di hende. “Mi a kere ku Hulanda no ta bai guera nunka, pues m’a drenta servisio militar pa haña un formashon”, ela splika. “Mi a sigui den e direkshon di enfermeria i tabata bai skol normal i partisipá den varios ehersisionan. Nan a siña mi disiplina i a hasími un hòmber den un periodo di seis luna”, ela splika. Di un partí, Roën  ta sostené pa introdusí servisio militar mandatario na Kòrsou, “ora mi mira kiko e eksperensia a hasí p’ami, mi ta kere ku e lo ta algu bon pa formashon di nos hóbennan”, ela kontinuá. Durante e periodo di entrenamentu, Roën  a optené mas ku 25 sertifikado i diploma.

018

Afganistan i PTSS

Pero despues di sinku aña den servisio militar hulandes, e atakenan terrorista di 11 di sèptèmber 2001 a tuma lugá, i Roën a keda manda Afganistan, unda ela forma partí di un “Black Horse Project”. Pasobra defensa Hulandes tabatin mester di hende, nan a rekruta asta kriminal pa drenta servisio militar, unda nan a bai den e Bravo/ Coyote compagnie. “Porta lo bo balota un kriminal, pero nos tabata e tim mas mihó di Europa, nos tabata e grupo di infantería, esun ku ta bai bringa”, ela splika. Roën tabata e médiko di e kompania ei, kende mester bai dilanti ku nan, ku dos ko’i tira. “E gainan akí no tabatin miedu di nada, i tabata desidido pa enfrenta tur kos ku por bini. Ora armanan nobo bini, nos tabata promé unu ku por a test e armanan”, ela kontinuá. E mishon na Afganistan tabata sinku luna, i esei tabata sufisiente pa Roën.

Nan grupo di bataya tabata e proménan ku a yegá Afganistan na 2006. “Ora bo ta e esnan promé, bo ta pasa den kos ku otronan ku otro sòldá kisas no lo pasa aden. A yega pasa ku nan a bombardiá tur nos trùk di kuminda, i nos mester a kome zürkol tres siman largu. I ora e avionnan tabata baha, bo por a haña e kuminda ku santu aden, komo variashon”, ela splika. Según Roën, no tabatin hopi moral bou di e sòldánan, paso nan a pèrdè varios kolega. “Tabatin koleganan a aksidentá den helikòpter, i asta tabatin sòldá ku a mata kurpa”, ela kompartí.

E insidente ku a afekt’e mas tantu, tabata ora su kolega a pèrdè su pia na edat di 18 aña. Un rakèt a bora e tanki di e hóben sòldá su vehíkulo i a destruí su pia. Roën a konta kon ora nan tabata drenta sierto pueblo, e muchanan tabata duna nan señal ku e enemigu tei, of nan tabata ripara ku n’e momentu ku nan yegá, e hendenan tabata kuminsá bai, paso e área tabata pèsta ku Talibán, i e situashon lo bai eskala mesora. Según Roën, e militarnan hulandes tabata hasí hopi mishon tabata den e zona berde di Deraoud, i e Talibán tabata bon arma, paso akí nan tabatin e plantashon nan di marihuana i simia di amapola, kual tabata nan forma di entrada pa nan kumpra arma. “Ora bo bin mete den e zona akí, bo a mishi ku algu oro, pues nan tabata bon arma. Danki Dios nan tabata falta di entrenamentu i no por a tira bon, sino mí no ta sinta akí”, ela splika. Tambe nan tabata traha ku varios tolk pa a komuniká ku e pueblo. “Ora e afgano kolaborá ku nos, e ta keda konsiderá un traidor, i tabata piedra nan ora gara nan. Pero kaminda tin sèn tur hende ta kooperá, pero e riesgo tabata keda na nan”, Roën a splika.

Sali fo’i e túnel skur

“Mi a mira hopi kos hororoso i mi mester a yuda i kuida mi koleganan i asina a realisá kon frágil bida ta”. E eksperensianan akí a resulta den Roën  su diagnosis di PTSS (trastorno di  strès postraumátiko). “M’a kue e eksperensianan i a internalisá nan i loke m’a mira a traha hopi ku mi”, ela splika. “Na Afganistan algun sikólogo ta bin puntra kon bo ta sinti, pero pa ta honesto, no tabatin niun tratamentu signifikante”. Ta ora Roën  a regresa yegá Hulanda, ela realisá ku tin algu ku no ta klòp. “Ora bo ta einan bo ta den e preshon, pero bo ta ripara ku bo no ta e mes un persona ku a drenta servisio militar”, ela añadi. Espesialmente temporada di desèmber ku klapchi tabata difísil pa Roën. “Mi kurpa kièr a bai trabou, pero mi mente no kièr a bai mas. Marechaussee a bin buska mi na kas, pero m’a skonde bou di kama. Mi tabata asina leu, ku mi no kièr a bai traha más”, ela splika. Roën tabatin 22 aña so ora ela sali fo’i servisio militar hulandes. “Ta ora ma sali for di servisio militar mi a kuminsá haña mi tratamentu sikológiko  ku a yuda mi sali fo’i e situashon”, ela splika. Akí Roën  a tuma un break di un aña, unda ela kuminsá trein den gym pa haña su  kurpa bèk den kondishon.

Bista pa un futuro briante

“Poko poko mi a kuminsá traha atrobe i  m’a habri un tiendo online yama Robri’s”, ela splika. Apresar di e PTSS, Roën  a logra kompletá su estudio komo supervisor finansiero HBO na e instituto LOI. Finalmente Roën a disidí na aña 2013 pa regresa Kòrsou pa kuminsá un negoshi yama Oportunity Finance, kual ta un karchi di krédito pa sumanan chikitu. E ta spera di habri su portanan na Desèmber 2015.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: