1 Comment

Eldrion Regina ta kontinuá ku su mishon pa inspira Kòrsou!

WILLEMSTAD – E tema ku a domina nos komunidat e ultimo tempu definitivamente ta inspirashon. E luna akí, hóben i grandi a reuní pa tende diferente orador di renombre, kende a primintí di a diskubrí e formula kon pa biba un bida yená ku propósito. Un hóben ku sigur ta hasiendo furor ku su videonan inspirashonal i charla bon bishitá, ta Eldrion Regina di 29 aña di edat. Su mensahe ta simpel, buska inspirashon den tur kos i lo bo haña bo mishon riba e mundu akí. E mensahe akí sigur a atrae e hóben Juranklin Marten, kende a hasí tur esfuerso pa por a asistí na e charla.   

Eldrion a opservá un persepshon negativo propio ku hopi yu di Kòrsou tin, pero niun hende ta trata di kambia. Ku su pelíkulanan inspirashonal kòrtiku, kual e ta publiká riba su página di Facebook ku tin más ku 7 mil siguidó, Eldrion ta purba trese kambio den esaki, pero ta insistí ku e no ta simplemente un orado di motivashon. “Mi ke duna e persona liña pa piska i para na e otro banda di baranka i mustr’e kon ami a piska”, ela splika. Eldrion a uni forsa ku èks militar, Roën Trinidad, inspirá pa su eksperensianan na Afganistan, i Didi Gregorius, short stop di Yankees, pa duna su promé charla na Kòrsou. Mas ku 300 persona a reuní pa skucha kon importante ta pa determina bo mishon, bo vishon,  i últimamente bo strategia di bida.

Juranklin Marten di 18 aña di edat, studiante di Electro na MTS, a tende di Eldrion i su pelíkulanan kòrtiku via di Facebook  i na skol.  E hóben ambisioso, kende ta propietario di J System Design, a konta su mayornan di  e klipnan, i nan a haña ta un bon idea pa e asistí e charla.  “M’a bai yuda bende kuminda serka un konosí, pa por a sera e sèn pa bai e evento”, ela splika. Eldrion sigur tabatin un impakto riba e hóben, kende tambe a produsí un pelíkula kòrtiku ku su amigunan di skol na yüli. “M’a mira e trabou di Eldrion, paso mi tambe kièr a bai den e  direkshon di motiva hende”, ela kontinuá. E mensahe mas importante ku Juranklin a tende ta ku si nos ke logra algu, nos mester enfoká riba nos meta. Tambe a resoná serka Juranklin, kon Eldrion ta enfatisá durante su charla pa nos no kibra otro i pa tene kuenta ku opinion di otro hende por kita bo of stroba bo di bai dilanti. “E ta djis un opinion, i no nesesariamente ta un echo”, ela deklará.

Didi, Roen, Juranklin, Eldrion

Didi Gregorius, Roen Trinidad, Juranklin Marten, Eldrion Regina

Un par di dia despues, Roën a topa ku Juranklin na su ofisina, unda nan a kòmbersá di Roën  su eksperensia di servisio militar i Afganistan. Tambe Roën a splik’e kiko e meta di su kompania Oportunity Finance ta. “E kòmbersashon a yuda mi bon pa mi enfoká mas mihó riba mi metanan i tambe a inspira mi kon mi ta bai kombertí mi propio kompania di filmashon i media den unu eksitoso”, Juranklin a splika. Sentral ta para e balor di hende, “ohalá mas hende i kompania por traha huntu, pasobra mi soño ta ku na Kòrsou nos kuminsá produsí mas produkto, en bes di importa tur kos. Asina kosto di bida por baha signifikantemente”, e hóben a konkluí.

Kambio di mentalidat i beisbol

Edrion baseballE problema ku Eldrion ke solushoná ta nos mentalidat isleño, ku según Eldrion, ta keda desaroyá ora nos no ta biaha of biba afó. “Roën ta yam’é tùnel visie. Nos no mester pensa A of B kaminda tin henter un álfabèt di pensamentu”, Eldrion a splika. Eldrion ta bin di un famia akadémiko, pero promé ku ela bai Hulanda na 2008 pa su estudio, ela hungá beisbol un temporada na New Jersey, Merka, na Sussex County Community College.

Inisialmente Eldrion a ambishoná un karera profeshonal, i asta a haña un oportunidat pa firma pa hunga na Sto. Domingo na 2004, pero n’e momentu e mes ta atmití ku ela tuma e ‘safe road’. “Dor di influensia tantu di mi mayornan, amigunan i konosinan, kende a bisa mi ku nan lo a wanta ami komo yu di Kòrsou abou. Si mi ta arepentí di algu den mi bida, ta esei,”, e hóben ta reflekshoná. “Oportunidat ta mane lechi, aworakí bo por bebe i ora e kaduká bo no por bebe más. Mi tabatin 18 aña, i ta jammer paso ta e skout di Florida Marlins tabata yama mi tur dia. Mi tabatin tur e hèrmènt pero mi no por a ‘pull the trigger’ ela splika.

Pues ora Eldrion a kaba su MTS bouwkunde na 2007, ela mira ‘college’ merikano komo su lastu oportunidat. “Mi a hasí un ‘tryout’ tremendo, i ma haña un beka kasi kompletu. Ora mi tabata einan, mi a deskubrí ku e skol no tabata enfoká sufisiente riba beisbol, i scoutnan no tabata wak bo hungá, aunke mi tabata hungá super bon”, Eldrion a splika. Eldrion kièr a transferí pa un skol na Florida, pero a enfoká solamente riba esaki i no a wak otro opshon na Arizona of Texas. “Ora esaki no a resulta, mi na disidí di stop i bai Hulanda, pero ora m’a yega Hulanda, m’a hungá beisbol ku Sparta/ Feyenoord hoofdklasse na 2009. Na 2010 i 2011 m’a hungá ku DOOR Neptunes ku awor a bira Curaçao Neptunes awor ku Bon Intenshon ta para nan tras”.

Studiante di bida

Na Hulanda, Eldrion a kuminsá studia ‘Small Business & Retail Management’, pero despues ela kambia pa ‘International Business Management & Studies’ na Den Haag. “E tabata e mihó estudio p’ami unda m’a konosé diferente kultura i m’a siña diferente manera di pensa”, Eldrion a splika. Espesialmente esun mentalidat chines a siña Eldrion kon importante ta pa tin un enfoke. E enfoke a hala su atenshon asina tantu, “pa asina mi definí kiko mi ta bai logra ku mi bida”, ela splika. Akí Eldrion a kuminsá studia diferente grandi ku a influensia mundu den diferente ramo, manera Mahatma Gandhi, Steve Jobs, Michael Jordan, i Martin Luther King i tambe a studia nan étika di trabou. “Nan manera di pensa a influensia mi propio ‘blue print”, ela añadi.

Asina a inisiá un período di auto búskeda interesante pa Eldrion, kende a disidí di konsentrá riba aktividatnan ku hende lo yam’é danki p’e, na lugá dun’e pabien. “Mi ta un empresario i kièr a haña e eksperensia mas lihé posibel, pero m’a disidí di tuma e temporada akí pa eksplorá  i analisá kiko realmente ta mi signatura”, ela splika. Eldrion su soño ta pa laga un tremendo legasia riba un manera no konvenshonal. “Mi no ta prepara muchu, pero mi ta djis bula fo’i un avion i den laira mi ta kreá un chut. Mi ta bida den futuro pega den presente”, ela splika.

Fundashon Un Focus Diferente

Eldrion short filmNunka tabata e intenshon pa Eldrion lanta un fundashon, pero ora ela traha e promé pelíkula kòrtiku, esaki a kai den asina bon tera, ku e kier produsí mas, pero esaki tin su gastunan mara na dje. Diferente kompania ku no kièr a duna direktamente na un persona, pero lo a sostené un fundashon sí. “M’a siña di e eksperensia i awó mi tin mihó bista kon Kòrsou ta funshoná ora di pidi sponsor”. Un siman promé ku e seminario, tabatin solamente 11 karchi bendí. “M’a keda trankil i a sigui i na delaster momentu e hendenan a reakshoná masalmente, i einan m’a siña konosé e kultura di Kòrsou. Un kos great si ta ku e hendenan a bin trempan, pa no a pèrdè nada”, Eldrion a splika.

“Maske algun a haña e charla na rason di 50 florin karu, tòg tur hende ku a presensia esaki tabata satisfecho. Ainda mi no a saka ganashi pa hasí algu grandi, pero si m’a kubri tur gastu”, Eldrion a konkluí.

Pa 2016, e mensahe drenta tur skol, of lo mester trese e hóbennan huntu na un lokalidat, paso Eldrion a konstatá ku durante un charla e mensahe ta yegá mas miho n’e. “E nuebe pelíkula kòrtiku ku a sali fo’i kuminsamentu di yüni te febrüari 2016, lo bira un buki unda e ke hasí mas hende konsiente di e profundidat tras di e mensahe.

Check out e pelikula kortiku ‘Prinsipio & Feeling’

Advertisements

One comment on “Eldrion Regina ta kontinuá ku su mishon pa inspira Kòrsou!

  1. Blessed Siguí riba e bon kaminda!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: